Den nye teaterskulen TITAN har hatt eit aktivt første skuleår. Skulen har like mykje aktivitet på eit år som andre får til på tre, heiter det i eit brev frå skulen.

Skodespelar-klassa har elevar frå fem ulike nasjonar, og lærarane representerer same breidda ved den nystarta The International Theatre Academy Norway (TITAN).

Etter eitt år i drift er aktivitetane mange: Elevane har iscenesett H. C. Andersens Edens hage og er klar for København og festivalen til ære for den store eventyrforfattaren. Dei har også produsert tre einmanns-framsyningar i ulike teater i Oslo.

I mai står Tyrkia for tur, med Vigelandsforteljingar som elevane har fått frifondsmidlar til. I juni reiser elevane til Bali i Indonesia for å studere teaterritual og dans.

Skulen reknar også med snart å få godkjenning frå Statens Lånekasse for utdanning.

- Studentane lærer å verte uavhengige, sjølvstendige artistar som er i stand til å skape utan støtte frå teatra og direktørane. Mange har sagt til meg at Noreg treng denne skulen, seier direktør Jim Hart i TITAN i brevet.